परिभाषार्थमञ्जरी

एतत्तुल्यन्यायेति। यद्व्यक्तीति तुल्यन्यायेत्यर्थः। शब्दान्तरेचेति। अत्रेदं बोध्यम्। कृताकृतेति परिभाषाया आद्यंशस्यैव प्रपञ्चः। क्वचित् कृताकृतेति वक्ष्यमाणपरिभाषा तदुदाहरणं तुदतीत्यादि। तद्विपरीतं नित्यमित्यस्य तु शब्दान्तरस्य शब्दान्तरच्छब्दान्तरे [1]चेति प्रपञ्चः। आद्योदाहरणं तु मूले एव स्पष्टम्। द्वितीयोदाहरणन्तु तुदतीत्यादि। गुणे कृते [2]शब्दान्तरत्वात्तत्प्राप्तेः [3]लक्ष्यानुरोधात्तु वक्ष्यमाणक्वचिदित्यनया बाधः। तृतीयोदाहरणं तु करिष्यतीत्यादि। लादेशे कृते स्यादीनां शब्दान्तरे प्राप्तत्वेन नित्यत्वं न किन्तु परत्वात्तिबा‌दय इति॥४४॥

[1]वेति इति के

[2]शब्दान्तरात् इति गे

[3]लक्ष्यानुसारात् इति के,गे