​

कामाख्या

नञ्घटितमिति। नञ्घटितसूत्रविधेयमित्यर्थः।हे सुभ्रु इति । अत्र नदीत्वेनाम्बार्थेति ह्रस्वः सिद्धः। सर्वा अनूद्य खण्डयति। तन्नेति। नन्वेवं भाष्येऽविचारितसूत्राणामप्यप्रामाणिकत्वं स्यादत आह भाष्येति। नन्वेवं गुणादिशब्दानां वैयर्थ्यापत्तिरत आह भाष्याविचारितेति। एवं सर्वसाधारणदोषमुक्त्वा द्वितीयमसाधारणदोषेण खण्डयति किञ्चेति। अप्रसिद्धेरिति। तथा च ज्ञपकत्वासंगतिः। लोड्ग्रहणवदिति। यथा तव लोट् ग्रहणं व्यर्थमदृष्टार्थम्वा तथा ममापि आडागमशून्यप्रयोगाभावेनाड्ग्रहणमपि व्यर्थमदृष्टार्थं स्पष्टप्रतिपत्यर्थम्वेति भावः। अतएव। आगमशास्त्रमनित्यमित्यस्याभावादेव। प्रत्याख्यातमिति। वेत्युपादानं दधात् दधदित्युभयसिद्ध्यर्थन्तच्च लोपस्यनित्यत्वेऽपि सिध्यतीति भावः। आट्यसतीति। भवत्सम्मतपरिभषया आट्यसतीत्यर्थः। ननु यदीयं परिभाषैव न स्यात्तदाऽस्या अनित्यतायां घोर्लोप इति सूत्रस्थं वा ग्रहण् ज्ञापकमिति कैयटोक्तं विरुध्येतेति शङ्कानिवारणार्थन्तन्मतं दूषयति एतेनेति। अन्यत् सर्वं सुगममिति॥९८॥