कामाख्या

सर्वविधिभ्यइति। लोपविधेः सर्वविध्यपेक्षया बलवत्वे 'नाग्लोपी'त्यत्र प्रत्याहारग्रहणं ज्ञापकम्, अन्यथा पूर्वं वृद्धावकारातिरिक्तस्याको लोपाभावेन तद्वैयर्थ्यं स्पष्टमेवेति प्राञ्चः। वस्तुतस्तु वृद्ध्यापेक्षयैव लोपस्य बलवत्वज्ञापकताया भाष्योक्तत्वेन सामान्यापेक्षज्ञापकत्वे मानाभावेनेदं चिन्त्यम्। इड्विधेर्बलवत्वे 'नेड्वशी'त्यत इडित्यनुवर्तमाने 'आर्धधातुकस्येडि'त्यत्रेट्ग्रहणं ज्ञापकमिति प्राञ्चः। भाष्यकृता च तस्य प्रत्याख्यानेनेदमप्रमाणमिति भावः। नन्वेवमुक्तवचनप्रयोजनानां स्वायम्भुवमित्यादीनां का गतिरत आह स्वायम्भुवमित्यादीति।॥१००॥