कामाख्या

अन्तरङ्गपरिभाषाबाधिकामवतारयति नन्वेवमपीति। पूर्वेक्तस्थलत्रये निर्वाहेऽपि। अन्तरङ्गत्वादिति। पदद्वयापेक्षसमाससापेक्षल्यबपेक्षया दधातेर्हिरित्यादेरन्तरङ्गत्वात्। ल्यप्बाधतेइति। धर्मिग्राहकमानादन्तरङ्गनिमित्तविनाशक एव ल्यप् गृह्यते। अत एव अभिवाद्येत्यादौ णिज्निमित्तकवृद्धौ लघुपूर्वत्वाभावेन णेरयादेशेन। न च ल्यब्विषयेऽन्तरङ्गन्नेत्येव ज्ञाप्यतां 'न ल्यपी'ति च न कार्यमिति वाच्यम्। निरेष्य गत इत्यत्रान्तरङ्गस्य लघुपधगुणस्याप्यप्रवृत्त्याऽयादेशापत्तेः। संकीर्त्येत्यादावीत्वानापत्तेश्च। यत्तु 'न ल्यपी'ति सूत्राकरणलाघवात् प्रकृतिप्रत्ययमात्रनिमित्तकं कार्यं ल्यव्विषये न प्रवर्तत इत्येव ल्यब्ग्रहणेन ज्ञाप्यत इति। तन्न, अधीत्येत्यत्र तुकोऽप्यभावापत्तेः। यदपि क्त्वाश्रयानुबन्धकार्याणां ल्यब्विषयेऽप्रवृत्तिरित्येव ज्ञाप्यत इति। तदपि न। अनुभूयेत्यादौ गुणनिषेधानापत्तेः। प्रोह्येत्यत्र संप्रसारणस्य प्रमथ्येत्यत्र न लोपस्य च अभावापत्तेश्चेति दिक्॥५४॥