कामाख्या

अपवादप्रसङ्गादाह तच्छीलादीति। ण्वुलपीति। कर्तृसामान्ये विहितस्य ण्वुलस्ताच्छील्यविशिष्टकर्तरि विधाने बाधकाभावात्। ननु अर्थविशेषे तृनो विधानादस्यापवादत्वं सुवचमिति शङ्कते। न चेति। विकल्पेनेति। 'वाऽसरूपोऽस्त्रियामि'त्यनेनेति भावः। एकाज्भ्यइति। एकाचि हि ञिन्निमित्तकाद्युदातत्वे लिन्निमित्तकान्तोदात्तत्वे वा विशेषाभावादिति भावः। विषयसप्तमीति। तेनैकस्यापि ताच्छीलिकत्वे इयं प्रवर्तते। एतत्फलितमाह तेनेति। ननु ताच्छीलिकेषु वासरूपविध्यभावे कम्रा, कम्पने, गन्ता, गामुकः, विकत्थी, विकत्थन इत्यादि न सिध्येदित्याशङ्कते नन्वेवमिति। दीपेर्युज्निषेधेनेति। नमिकंपीति। रेण बाधादेव युचोऽभावासिद्धेरिति भावः॥६८॥